ഖത്തര്‍ ലോകകപ്പിന് യോഗ്യത നേടിയതിന് പിന്നാലെ ഏറ്റവും പുതിയ ഫിഫ റാങ്കിംഗ് പുറത്തുവന്നപ്പോള്‍ അര്‍ജന്റീന 2018നു ശേഷം ആദ്യ അഞ്ച് സ്ഥാനങ്ങളില്‍ ഇടം നേടി. ആറാം സ്ഥാനത്തുണ്ടായിരുന്ന അര്‍ജന്റീന ഇറ്റലിയെ മറികടന്നാണ് അഞ്ചാം സ്ഥാനത്തെത്തിയത്. ലോകകപ്പ് യോഗ്യത മത്സരത്തില്‍ ഉറുഗ്വായ്ക്കെതിരെ നേടിയ വിജയവും ബ്രസീലിനെതിരെ നേടിയ സമനിലയും റാങ്ക് നില മെച്ചപ്പെടുത്താന്‍ ടീമിനെ സഹായിച്ചു.റാങ്ക് നില മെച്ചപ്പെടുത്തിയതോടെ ഖത്തര്‍ ലോകകപ്പിനുള്ള സീഡഡ് ടീമുകളില്‍ ഒന്നായി അര്‍ജന്റീന മാറാനുള്ള സാധ്യത വര്‍ധിച്ചു.
അര്‍ജന്റീനയടക്കം 13 രാജ്യങ്ങളാണ് ഖത്തര്‍ ലോകകപ്പ് ടിക്കറ്റ് ഉറപ്പാക്കിയത്. യൂറോപ്പില്‍ നിന്ന് ജര്‍മനി, ഡെന്‍മാര്‍ക്ക്, ഫ്രാന്‍സ്, ബെല്‍ജിയം, ക്രൊയേഷ്യ, സ്പെയിന്‍, സെര്‍ബിയ, സ്വിറ്റ്‌സര്‍ലന്‍ഡ്, ഇംഗ്ലണ്ട്, നെതര്‍ലന്‍ഡ്‌സ് എന്നിവരും ദക്ഷിണ അമേരിക്കയില്‍ നിന്ന് ബ്രസീലും അര്‍ജന്റീനയുമാണ് യോഗ്യത നേടിയിരിക്കുന്നത്. അതിഥേയരായതിനാല്‍ തന്നെ ഖത്തര്‍ നേരിട്ട് യോഗ്യത ഉറപ്പാക്കിയിരുന്നു. അതെ സമയം ഫിഫ റാങ്കിങ്ങിൽ ബെൽജിയം ഒന്നാം സ്ഥാനത്ത് തുടരുകയാണ്, ബ്രസീൽ, ഫ്രാൻസ്, ഇംഗ്ലണ്ട് എന്നീ ടീമുകളാണ് യഥാക്രമം രണ്ടും മൂന്നും നാലും സ്ഥാനങ്ങളിൽ അർജന്റീനയ്ക്ക് മുൻപിൽ ആയുള്ളത്.
