ഏഷ്യൻ ചാമ്പ്യൻസ് ട്രോഫി കിരീടം നിലനിർത്തി ഇന്ത്യൻ വനിതാ ഹോക്കി ടീം. ചൈനയെ എതിരില്ലാത്ത ഒരു ഗോളിന് തോൽപ്പിച്ചാണ് ഇന്ത്യൻ വനിതകൾ ഫൈനലിൽ ജയിച്ചു കയറിയത്. ദീപിക സെഹ്‌രാവത്താണ് ഇന്ത്യയ്ക്ക് വേണ്ടി ഗോൾ നേടിയത്. പെനാൽറ്റി സ്‌ട്രൈക്കിലൂടെയായിരുന്നു ദീപിക ഗോൾ നേടിയത്. 11 ഗോളുകൾ നേടിയ ദീപിക തന്നെ ആണ് പ്ലേയർ ഓഫ് ദി ടൂർണമെന്റ് പുരസ്‌കാരം നേടിയത്. നേരത്തെ സെമിയിൽ എതിരില്ലാത്ത രണ്ട് ഗോളുകൾക്ക് ജപ്പാനെ തകർത്താണ് ഇന്ത്യൻ വനിതകൾ ഫൈനലിൽ പ്രവേശിച്ചത്.

ഇതോടെ ടൂർണമെന്റ് ചരിത്രത്തിൽ ഏറ്റവും കൂടുതൽ കിരീടം നേടിയ റെക്കോർഡിൽ ഇന്ത്യ ദക്ഷിണകൊറിയയ്ക്കൊപ്പമെത്തി. മൂന്ന് വീതം കിരീടങ്ങളാണ് ഇന്ത്യയും ദക്ഷിണാഫ്രിക്കയും നേടിയിട്ടുള്ളത്. 2016 , 2023 വർഷങ്ങളിലായിരുന്നു ഇന്ത്യയുടെ കിരീട നേട്ടം. ഇന്ത്യൻ വനിതാ ഹോക്കി ടീമിന്‍റെ വിജയത്തിന് ശേഷം ഹോക്കി ഇന്ത്യ എല്ലാ കളിക്കാർക്കും 3 ലക്ഷം വീതവും എല്ലാ സപ്പോർട്ട് സ്റ്റാഫിന് 1.5 ലക്ഷം വീതവും പാരിതോഷികം പ്രഖ്യാപിച്ചു. മത്സരത്തിന്‍റെ ചരിത്രത്തിൽ ആദ്യമായി പോഡിയം ഫിനിഷർമാർക്കുള്ള പാരിതോഷികവും പ്രഖ്യാപിച്ചു. ഇന്ത്യക്ക് 10,000 യുഎസ് ഡോളര്‍ ലഭിക്കും, ചൈനയ്ക്കും ജപ്പാനും യഥാക്രമം 7000, 5000 ഡോളര്‍ നൽകും.