എം. ടി വാസുദേവൻ നായരുടെ പത്ത് കഥകളെ ആസ്പദമാക്കി ഒരുങ്ങുന്ന ആന്തോളജി ചിത്രമാണ് മനോരഥങ്ങൾ. മമ്മൂട്ടി,മോഹൻലാൽ, ആസിഫ് അലി, ഫഹദ് ഫാസിൽ, ബിജു മേനോൻ, ഇന്ദ്രജിത്ത് സുകുമാരൻ, പാർവതി തിരുവോത്ത്, വിനീത്, സുരഭി ലക്ഷ്മി, ആൻ അഗസ്റ്റിൻ തുടങ്ങിയവർ ഭാഗമാവുന്ന ആന്തോളജി സീരീസ് സീ5ലൂടെ ആഗസ്റ്റ് 15നാണ് റിലീസ് ചെയ്യുന്നത്. സംവിധായകരായ പ്രിയദർശൻ, ജയരാജ്, ശ്യാമപ്രസാദ്, സന്തോഷ് ശിവൻ, മഹേഷ് നാരായണൻ, രഞ്ജിത്ത്,രതീഷ് അമ്പാട്ട് തുടങ്ങിയവരാണ് ചിത്രങ്ങളൊരുക്കുന്നത്.
ആന്തോളജിയിലെ ഒരു ചിത്രമായ വിൽപ്പന സംവിധാനം ചെയ്യുന്നത് എംടിയുടെ മകളും നർത്തകിയുമായ അശ്വതി വി നായരാണ്. ആസിഫ് അലിയും മധുബാലയുമാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. എന്നാൽ മനോരഥങ്ങളിൽ ഒരു സിനിമ സംവിധാനം ചെയ്യാമെന്ന തീരുമാനം യാദൃച്ഛികമായിരുന്നു എന്ന് അശ്വതി പറയുന്നു. സിനിമ സംവിധാനം ചെയ്യാൻ ധെെര്യമില്ലാതെയിരുന്ന തനിക്ക് അതിന് വേണ്ടി ആത്മവിശ്വസം സന്തോഷ് ശിവൻ അടക്കമുള്ളവരായിരുന്നു എന്ന് അശ്വതി പറയുന്നു. കഴിഞ്ഞ നാല് വർഷത്തെ യാത്രയിൽ ഒരുപാട് കാര്യങ്ങൾ പഠിക്കാൻ സാധിച്ചു എന്നും ഞങ്ങൾ എല്ലാവരും ചേർന്ന് അച്ഛന് നൽകുന്ന ഒരു ആദരമാണ് മനോരഥങ്ങൾ എന്നും അശ്വതി മാതൃഭൂമി ഡോട്ട്കോമിനോട് പങ്കുവച്ചു.
‘ഓളവും തീരവും’ എന്ന ചിത്രം പ്രിയദർശനാണ് സംവിധാനം ചെയ്യുന്നത് മോഹൻലാലാണ് പ്രധാന വേഷത്തിൽ. ‘ശിലാലിഖിതം’ എന്ന ചിത്രവും പ്രിയദർശനാണ് സംവിധാനം ബിജു മേനോനാണ് നായകൻ. ‘കടുഗണ്ണാവ ഒരു യാത്രക്കുറിപ്പ്’ എന്ന ചെറുകഥ ‘നിന്റെ ഓർമ്മക്ക്’ എന്ന ചെറുകഥയുടെ തുടർച്ചയെന്ന നിലക്ക് എം ടി എഴുതിയതാണ്. ഇതിലെ കേന്ദ്ര കഥാപാത്രത്തെ മമ്മൂട്ടിയാണ് ചിത്രത്തിൽ അവതരിപ്പിക്കുന്നത്. രഞ്ജിത്താണ് സംവിധാനം. ശ്രീലങ്കയിലേക്ക് നടത്തുന്ന യാത്രയാണ് കഥാ പാശ്ചത്തലം. ജയരാജ് സംവിധാനം ചെയ്യുന്ന ‘സ്വർഗം തുറക്കുന്ന സമയം’ എന്ന ചിത്രത്തിൽ നെടുമുടി വേണു, സുരഭി, ഇന്ദ്രൻസ് എന്നിവരാണ് മുഖ്യവേഷത്തിൽ.
മഹേഷ് നാരായണൻ ഫഹദ് ഫാസിലെ കേന്ദ്ര കഥാപാത്രമാക്കി എടുക്കുന്ന ചിത്രം എംടിയുടെ ‘ഷെർലക്ക്’ ചെറുകഥ അടിസ്ഥാനമാക്കിയതാണ്. ‘അഭയം തേടി വീണ്ടും’ സന്തോഷ് ശിവനാണ് സംവിധാനം സിദ്ദിഖാണ് പ്രധാന വേഷത്തിൽ. പാർവതി തിരുവോത്ത് പ്രധാന വേഷത്തിലെത്തുന്ന ‘കാഴ്ച’ഒരുക്കുന്നത് ശ്യാമപ്രസാദ് ആണ്. രതീഷ് അമ്പാട്ട് ‘കടൽക്കാറ്റ്’ എന്ന ചിത്രം സംവിധാനം ചെയ്യുന്നു ഇന്ദ്രജിത്തും അപർണ്ണ ബാലമുരളിയുമാണ് പ്രധാന കഥാപാത്രങ്ങളാകുന്നത്.
