‘കിഷ്കിന്ധാ കാണ്ഡം’ എന്ന സിനിമ പ്രേക്ഷക പ്രീതിയിലും, ബോക്സ്ഓഫിസിലും ഒരു പോലെ ചരിത്രം സൃഷ്ടിക്കുമ്പോൾ ഏറെ പ്രശംസ പിടിച്ചു പറ്റുന്നത് ചിത്രത്തിന്റെ സിനിമോട്ടോഗ്രാഫറും/ തിരക്കഥാകൃത്തും ആയ ബാഹുൽ രമേഷ് ആണ്. ഹ്രസ്വ ചിത്രങ്ങളിലൂടെ സിനിമ മേഖലയിലേക്ക് കടന്നു വന്ന ബാഹുൽ മോഹന്‍ കുമാര്‍ ഫാന്‍സ്,കക്ഷി അമ്മിണിപ്പിള്ള, ഇന്നലെ വരെ തുടങ്ങിയ ചിത്രങ്ങളുടെ ഛായാഗ്രാഹകൻ ആണ്. ‘കിഷ്കിന്ധാ കാണ്ഡം’ എന്ന ചിത്രത്തെ കുറിച്ചും, എഴുത്തിന്റെ രസതന്ത്രത്തെ കുറിച്ചും, ഇഷ്ട്ട സിനിമകളെ കുറിച്ചും ബാഹുൽ രമേഷ് സംസാരിക്കുന്നു.

1- ഹ്രസ്വ ചിത്രങ്ങളിലൂടെ സിനിമയിലേക്ക് കടന്നുവന്നുകൊണ്ട് ഈ ഓണക്കാലത്തെ ഒരേ സമയം പ്രേക്ഷക പ്രീതിയും, ബോക്‌സ് ഓഫീസ് വിജയവും കരസ്ഥമാക്കിയ ഒരു ചിത്രത്തിന്റെ സ്‌ക്രീന്‍ പ്ലെ/ക്യാമറ റോളിലേക്ക് എത്തിച്ചേര്‍ന്നിരിക്കുന്നു. ഈ യാത്രയെകുറിച്ച ഒന്ന് പറയാമോ ?

A-കിഷികിന്ധാ കാണ്ഡം ചെറിയ ഒരു സിനിമയാണെങ്കിലും ഞങ്ങളെ സംബന്ധിച്ചിടത്തോളം വലിയ ഒരു യാത്രയായിരുന്നു. ലോക്ഡൗണ്‍ സമയത്താണ് സ്‌ക്രിപ്റ്റ് ചെയ്തത്. സിനിമയാക്കാന്‍ വേണ്ടിയായിരുന്നില്ല എഴുതിത്തുടങ്ങിയത്. ഒരു ചെറിയ ശ്രമം മാത്രമായിരുന്നു. എഴുതിക്കഴിഞ്ഞ് വായിക്കാന്‍ പറ്റുന്ന അവസ്ഥയിലെത്തിയാല്‍ വളരെ അടുത്ത ആളുകള്‍ക്ക് വായിക്കാന്‍ കൊടുക്കാം എന്നാണ് ഉദ്ദേശിച്ചിരുന്നത്. അവര്‍ക്ക് ഓക്കെ ആണെന്നുണ്ടെങ്കില്‍ സിനിമ എന്ന രീതിയില്‍ മുന്നോട്ടുപോകാം എന്ന് കരുതിയിരുന്നു. ലോക്ഡൗണ്‍ സമയത്ത് എഴുതിക്കഴിഞ്ഞെങ്കിലും കോവിഡ് നിയന്ത്രണങ്ങളുമായി ബന്ധപ്പെട്ട പരിമിതികള്‍ ഉണ്ടായിരുന്നു. എഴുതിക്കഴിഞ്ഞ്് ദിന്‍ജിത്തേട്ടന് (ദിന്‍ജിത്ത് അയ്യത്താന്‍ – സംവിധായകന്‍) വായിക്കാന്‍ കൊടുത്തു. താല്‍പ്പര്യം ഉണ്ടെങ്കില്‍ മുന്നോട്ട് പോകാം എന്നും പറഞ്ഞു. പുള്ളിക്ക് ഇഷ്ട്‌പ്പെട്ടു, നമുക്കിത് ചെയ്യാം എന്ന് അദ്ദേഹം പറഞ്ഞു അങ്ങനെയാണ് ഇതിലേക്കിറങ്ങുന്നത്.

എന്നാല്‍ ഏതെങ്കിലും ഒരു പ്രൊഡക്ഷനെ സമീപിക്കാന്‍ സാധിക്കുന്ന സാഹചര്യം ആയിരുന്നില്ല അന്ന്. ഇനി ഏതെങ്കിലും പൊഡക്ഷനെ സമീപിച്ച്, അവര്‍ സിനിമ ചെയ്യാന്‍ തീരുമാനിക്കുകയാണെങ്കില്‍ തന്നെ ആ സമയത്തുള്ള ലോജിസ്റ്റിക്കല്‍ സിനാരിയോ, ബഡ്ജറ്റ് സിനാരിയോ വെച്ചായിരിക്കും അവര്‍ ഈ പ്രൊജക്ടിനെ കണ്‍സീവ് ചെയ്യുക. അങ്ങനെ വന്നാല്‍ ഒരു ലിമിറ്റഡ് ബഡ്്ജറ്റിലുള്ള ലിമിറ്റഡ് ക്രൂവിലുള്ള ഒരു ലോക്ഡൗണ്‍ പടം എന്ന രീതിയില്‍ ഈ സിനിമ ഒതുങ്ങിപ്പോകുമായിരുന്നു. അതുകൊണ്ട് തന്നെ തിരക്കുപിടിക്കണ്ട എന്നു തീരുമാനിച്ചു.

പിന്നീട് കുറച്ച് മാസങ്ങള്‍ക്ക് ശേഷമാണ് ആസിഫ്ക്കയെ (ആസിഫ് അലി) നേരിട്ട് കണ്ട് കഥ പറയുന്നത്. 2021 ലായിരുന്നു അത്. കഥ കേട്ടപ്പോള്‍ ആസിഫ്ക്കയ്ക്ക് നന്നായി ഇഷ്ടപ്പെട്ടു. നമുക്ക് ഇത് എത്രയും പെട്ടന്ന് ചെയ്യാന്‍ നോക്കാം, അടുത്ത പടങ്ങളുടെ ലൈന്‍ അപ് ഒന്ന് നോക്കിക്കോട്ടെ എന്ന് അദ്ദേഹം പറഞ്ഞു. ആസിഫ്ക്ക അപ്പോള്‍ ‘കൊത്ത്’ ന്റെ ഷൂട്ടിലായിരുന്നു. 2022 മാര്‍ച്ച്-ഏപ്രിലോടുകൂടി നമുക്കിത് തുടങ്ങാം എന്നാണ് തീരുമാനിച്ചിരുന്നത്. പക്ഷേ ആ സമയം ആവുമ്പോഴേക്കും ആസിഫ്ക്കയ്ക്ക് ഒഴിവുണ്ടായിരുന്നില്ല. പിന്നീട് 2022 ഓഗസറ്റ്-സെപ്റ്റംബറില്‍ തുടങ്ങാം എന്ന് തീരുമാനിച്ചു. ആ സമയത്താണ് വിജയരാഘവന്‍ ചേട്ടന്‍ ഉള്‍പ്പെടെയുള്ളവരുടെ കാസ്റ്റിങ് നടക്കുന്നത്. സുഷിന്‍ ആയിരുന്നു ആദ്യം മ്യൂസിക് ചെയ്യാന്‍ കമ്മിറ്റ് ചെയ്തിരുന്നത്. സുഷിനോട് കഥ പറയുന്നതും ഈ സമയത്താണ്. രോമാഞ്ചത്തിന്റെ വര്‍ക്കിലായിരുന്നു സുഷിന്‍ അപ്പോള്‍. എന്നാല്‍ നിര്‍ഭാഗ്യവശാല്‍ ആസിഫ്ക്കയുടെ ഡേറ്റ് വീണ്ടും നീണ്ടു.

2- ഛായാഗ്രഹകന്‍ തന്നെ സംവിധായകന്‍ ആകുന്നു, സംവിധായകന്‍ തന്നെ തിരക്കഥാകൃത് ആകുന്നു ഇതൊരു പുതിയ പ്രതിഭാസമല്ല എന്നാല്‍ തിരക്കഥയും, ഛായാഗ്രഹണവും ഒരുമിച്ച് കൈകാര്യം ചെയ്യുക എന്നത് വളരെ റെയര്‍ ആയി കണ്ടു വരുന്ന ഒന്നാണ്. ഇങ്ങനെ ഒരു അറ്റംപ്റ്റിന് പ്രേരിപ്പിച്ച പ്രൊഫഷണല്‍ ആന്‍ഡ് ക്രിയേറ്റിവ് റീസണ്‍സ് എന്തൊക്കെ ആണ് ?

2023 ജൂലൈ 1 ന്നാണ് കിഷ്‌കിന്ധാ കാണ്ഡം ഷൂട്ട് തുടങ്ങുന്നത്. പാലക്കാട് ജില്ലയിലാണ് ഏകദേശം തൊണ്ണൂറ് ശതമാനത്തോളം ഷൂട്ടും നടന്നത്. അപ്പുപിള്ള എന്ന കഥാപാത്രത്തിന്റെ ഫ്്‌ളാഷ് ബാക്ക്‌പോഷന്‍സ് മാത്രം കോഴിക്കോട് മിലിറ്ററി ക്യാമ്പിനുള്ളില്‍ വെച്ചാണ് ഷൂട്ട് ചെയ്തത്. അത് ഒരു ദിവസത്തെ ഷൂട്ട് മാത്രമായിരുന്നു. അതാണ് പറഞ്ഞത് മിനിമല്‍ റിക്വയര്‍മെന്റ്‌സ് ഉള്ള ഒരു ചെറിയ സിനിമയാണെങ്കിലും ഒരു വലിയ ജേര്‍ണിയായിരുന്നു. നാല് വര്‍ഷത്തോളം എടുത്തു പൂര്‍ത്തിയാവാന്‍. പക്ഷെ നല്ലതിന് വേണ്ടിയായിരുന്നു എന്ന് തോന്നുന്നു. നിലവില്‍ ഒരു ഓണം റിലീസ് കിട്ടി. ഓണക്കാലത്ത് ഇത്തരത്തിലുള്ള ഒരു സിനിമ ചര്‍ച്ച ചെയ്യപ്പെടുന്നത് ആപൂര്‍വമാണ് എന്ന് പലരും പറയുന്നുണ്ട്. അങ്ങനെയുള്ള നിരീക്ഷണങ്ങള്‍ നമ്മള്‍ വിചാരിക്കാത്ത തരത്തിലുള്ള റീച്ച് ലഭിക്കാനും കാരണമായി.

യാദൃശ്ചികമായി സംഭവിച്ചതാണ്. സ്‌കൂള്‍ കാലഘട്ടം തൊട്ടെ എഴുത്തില്‍ താല്പര്യം ഉണ്ട്. രചനാമത്സരങ്ങളിലൊക്കെ പങ്കെടുക്കാറുണ്ടായിരുന്നു. പിന്നീട് കോളേജ് കാലം കഴിയുന്നതോടുകൂടി ഒരു തൊഴില്‍ വേണമല്ലോ എന്ന തീരുമാനത്തിലാണ് സിനിമാറ്റോഗ്രഫിയിലേക്ക് കേറുന്നത്. വിദൂര ഭാവിയില്‍ എന്നെങ്കിലും ഒരു ശ്രമം നടത്തിനോക്കാം എന്നേ എഴുത്തിന്റെ കാര്യത്തില്‍ വിചാരിച്ചിരുന്നുള്ളു. പലര്‍ക്കും അസുഖകരവും നിര്‍ഭാഗ്യകരവുമായിരുന്ന കാലഘട്ടമായിരുന്നു കോവിഡ് കാലമെങ്കിലും എഴുത്തിന്റെ കാര്യത്തില്‍ എനിക്ക് ഇത്തരത്തില്‍ ഒരു ശ്രമം നടത്താനുള്ള അവസരം കോവിഡ് കാലത്ത് ലഭിച്ചു.

അതുപോലെ ഷോട്ട് ഫിലിമുകളൊക്കെ വളരെ ആസ്വദിച്ചാണ് ഞാന്‍ ചെയ്തിരുന്നത്. ‘ഗ്രെസ് വില്ല’ എന്ന ഷോട്ട് ഫിലിമാണ് ഞാന്‍ ചെയ്തിട്ടുള്ളതില്‍ വെച്ച് എനിക് ഏറ്റവും സംതൃപ്തി ലഭിച്ച ഒരു വർക്ക്.

കിഷ്‌കിന്ധാ കാണ്ഡം എഴുതുമ്പോള്‍ ക്യാമറാ മാന്‍ എന്ന നിലയില്‍, ഷൂട്ട് ചെയ്യാന്‍ ഇഷ്ടമുള്ള രീതിയില്‍ കൂടിയാണ് എഴുതിയത്. ഫ്രൈം ബ്യൂട്ടി അല്ലെങ്കില്‍ ലൈറ്റ് അപ് എന്നുള്ള അര്‍ത്ഥത്തില്‍ അല്ല, മറിച്ച് കഥാപാത്രങ്ങള്‍ തമ്മിലുള്ള ഇന്ററാക്ഷന്‍, അവരുടെ ചലനങ്ങള്‍ ഒക്കെ സ്‌ക്രിപ്റ്റ് എഴുതുമ്പോള്‍ സ്വാധീനിച്ചിട്ടുണ്ട്്. ഒരു ഉദാഹരണം പറയുകയാണെങ്കില്‍, സിനിമയുടെ തുടക്കത്തില്‍ അപര്‍ണ റേഡിയോ കാണുന്ന സീനുണ്ട്. അപര്‍ണ കൗതുകത്തോടെ ആ റേഡിയോ നോക്കി നില്‍ക്കുമ്പോള്‍ അജയന്റെ വോയിസ്ഓവര്‍ കേള്‍ക്കും. റേഡിയോ തന്നെയാണ് എന്ന ഡയലോഗ് കേള്‍ക്കുമ്പോള്‍ അപര്‍ണ തിരിഞ്ഞുനോക്കും. തൊട്ടപ്പുറത്ത പൂയങ്കേരിക്കാവ്, അങ്ങ് ആ കാണുന്നത് റിസേര്‍വ് ഫോറസ്റ്റ്, ഹനുമാനും സുഗ്രീവനും ഒഴികെ സകല വാനരപ്പടയും ഈ നാട്ടിലാണ് എന്ന് പറയുന്ന ഒരു സീന്‍. അത് തൊട്ടടുത്ത് നില്‍ക്കുന്ന ഒരാള് സംസാരിക്കുന്ന വിഷ്വലല്ല. കുറച്ച് ദൂരത്തുനിന്നാരോ വിളിച്ച് പറയുന്നതാണ്. അയാളത് ഉറക്കെയാണ് പറയുക. അത് പറയുമ്പോള്‍ കൈ ഉപയോഗിച്ച് ആക്ഷന്‍സ് കാണിക്കാം, റിസര്‍വ് ഫോറസ്റ്റിനെ പറ്റി പറയുമ്പോള്‍ ദൂരേക്ക് കൈ ചൂണ്ടാം. ചെറിയ ഫ്രെയിമാണെങ്കിലും അതൊരു വലിയ ഏരിയയുടെ പ്രതീതി ചിലപ്പോള്‍ ഉണ്ടാക്കും. ആ ലോകത്തെ കുറച്ചുകൂടെ വലുതാക്കും. ഒരു സബ്‌കോണ്‍ഷ്യസ് പ്രതീതിയാണത്. അത്തരത്തിലുള്ള ചിന്തകളൊക്കെ എഴുതുമ്പോള്‍ തന്നെ ഉണ്ടായിരുന്നു.

3- ധാരാളം ഇന്റര്‍പ്രട്ടേഷന്‍സ് സാധ്യതയുള്ള ഒരു ചിത്രമാണ് കിഷ്‌ക്കിന്ധാ കാണ്ഡം, പിരമിഡ് പോലെ ഒരു ലെയറില്‍ നിന്ന് തേഴേക്ക് പോകും തോറും കോണ്‍ഫ്‌ലിക്റ്റുകള്‍ കൂടി പ്രേക്ഷകനുള്ളില്‍ നൂറുചോദ്യങ്ങളുണ്ടാക്കുന്ന ഒരു മാന്ത്രികത കിഷ്‌കിന്ധാ കാണ്ഡത്തിന്റെ തിരക്കഥക്ക് ഉണ്ട് ? എത്രത്തോളം ശ്രമകരമായിരുന്നു റൈറ്റിങ് പ്രോസസ് ?

സ്‌ക്രിപ്റ്റ് ചെയ്യുന്ന സമയത്ത് അതൊതു ടാസ്‌കായി അഥവാ ജോലിയായി കണ്ടിട്ടില്ല. എഴുതുന്ന സമയത്ത് വളരെ ലാഘവത്തോടെയാണ് ചെയ്തിരുന്നത്. ഇത് സിനിമയാക്കിയേ മതിയാവു എന്ന സമ്മര്‍ദ്ദം ഉണ്ടായിരുന്നില്ല. തിരക്കഥയുടെ കാര്യത്തില്‍ ആരോടും കമ്മിറ്റ്‌മെന്റും ഉണ്ടായിരുന്നില്ല. ആര്‍ക്കും അറിയില്ല ഇങ്ങനെയൊരു എഴുത്ത് നടക്കുന്നുണ്ടെന്ന്. അതുകൊണ്ട് തന്നെ സ്വാതന്ത്ര്യം ഉണ്ടായിരുന്നു. എഴുതുന്ന സമയത്ത് Mind സ്വതന്ത്രമാക്കി വെക്കാനും സാധിച്ചു. എല്ലാ സീനുകളും ഏറ്റവും പെര്‍ഫെക്ട് ആകണം എന്നുള്ള യാതൊരു പിടിവാശിയും ഉണ്ടായിരുന്നില്ല.

ഞാന്‍ ഒരു മിഡില്‍ ക്ലാസ് ഫാമിലിയില്‍ നിന്നുള്ള ആളാണ്. വളരെ ഒതുങ്ങിയുളള ജീവിതമായിരുന്നു. ഒരുപാട് ആളുകളുമായി പരിചയവും ഇല്ല. എന്റെ പരിമിതമായ ലോകപരിചയവും അറിവുംകൊണ്ട് എന്ത് പറ്റുമോ അത് ചെയ്യുക എന്നായിരുന്നു ഉദ്ദേശം. എഴുതിക്കഴിഞ്ഞ് ആദ്യം വായിക്കുന്ന ആളില്‍ നിന്ന് ഒരു അഭിപ്രായം കേള്‍ക്കുക എന്നതായിരുന്നു എന്നെ എക്‌സൈറ്റ് ചെയ്യിപ്പിച്ച ഒരു കാര്യം. ഫീഡ്ബാക്ക് ചിലപ്പോള്‍ മോശമായിരിക്കും അല്ലെങ്കില്‍ നല്ലതായിരിക്കും. എന്തായാലും എനിക്ക് സന്തോഷമാണ്. ആ എക്‌സൈറ്റ്‌മെന്റിനെ കുറിച്ചുള്ള ചിന്ത തന്നെ എഴുതാനുള്ള പ്രോത്സാഹനമായിരുന്നു. ആതായിരിക്കാം എഴുത്ത് മുന്നോട്ട് പോകാനുണ്ടായ കാരണം.

4- ബാഹുലിന്റെ ഇഷ്ട്ട ഴോണര്‍ ത്രില്ലര്‍ ആണെങ്കിലും ഇന്‍വെസ്റ്റിഗേറ്റിവ്/സൈക്കോ ത്രില്ലറുകള്‍ അല്ല ട്രാഫിക് ഒക്കെ പോലെ ഉള്ള ത്രില്ലറുകള്‍ ആണ് എന്നൊരു അഭിമുഖത്തില്‍ പറയുകയുണ്ടായി, ഇഷ്ട്ടപ്പെട്ട മറ്റു ത്രില്ലര്‍ സിനിമകള്‍ ഏതൊക്കെ ആണ് (WORLDWIDE )

എന്തുതരം കഥയും ആവട്ടെ, പുതിയ കഥതന്നെ ആവണം എന്നില്ല, കണ്ടു പരിചയമില്ലാത്ത ഒരു പരിസരത്താണ് അത് പ്ലേസ് ചെയ്യുന്നതെങ്കില്‍ എനിക്ക് ഭരയങ്കര സന്തോഷം തോന്നാറുണ്ട്. അതുപോലെ ഏറ്റവും ഇഷ്ടമുള്ള ഒരു സിനിമയാണ് The Prestige. ഞാന്‍ ഏറ്റവും കൂടുതല്‍ കണ്ടിട്ടുള്ള സിനിമയും Prestige ആയിരിക്കും. ഒരു ടിപ്പിക്കല്‍ രീതിയിലല്ല ആ സിനിമ മുന്നോട്ട് പോകുന്നത്. ഡ്രമാറ്റിക്കായിട്ടുള്ള കോണ്‍ഫ്‌ലിറ്റുകള്‍ ഉണ്ടാവുക, ഡ്രമാറ്റിക്കായിട്ടുള്ള ഡിലെമ്മകളുള്ള കഥാപാത്രത്തിന്റെ കഥയുണ്ടാവുക എന്നതൊക്കെ എനിക്ക് ത്രില്ലിങ് ആണ്.

Kapoor $ Sons എന്ന ഒരു ഹിന്ദി സിനിമയുണ്ട്, അത് പക്കാ ഫാമിലി ഡ്രാമയാണ്. അതില്‍ മര്‍ഡര്‍ മിസ്റ്ററിയോ അങ്ങനെയുള്ള കാര്യങ്ങളോ ഒന്നും ഇല്ല. എന്നാല്‍ ഞാന്‍ ആ പടം കണ്ടത് ഒരു ത്രില്ലര്‍ പടം കാണുന്ന ആവേശത്തിലാണ്. അതിനു കാരണം സിനിമയുടെ സ്‌ക്രിപ്റ്റിങ്ങിലെ ഒത്തിരി കോണ്‍ഫ്‌ലിറ്റുകളും ഡിലെമ്മകളും ആണ്. അതെനിക്കിഷ്ടമാണ്. Jordan Peele എന്ന സംവിധായകന്റെ സിനിമകള്‍ ഇഷ്ടമാണ്. പൊതുവെ എല്ലാവര്‍ക്കും ഇഷ്ടമുള്ള അദ്ദേഹത്തിന്റെ സിനിമ Get out ആണ്. എന്നാല്‍ എനിക്ക് അദ്ദേഹത്തിന്റെ Nope എന്ന സിനിമയാണ് ഇഷ്ടം. ഹൊറര്‍ സിനിമകളിലെ ക്ലീഷെ സീനുകളില്ല. പട്ടാപകല്‍ ആണ് ആ സിനിമയിലെ ഹൊറര്‍ സീക്വന്‍സുകള്‍ മുഴവന്‍ നടക്കുന്നത്. അതുകൊണ്ട് തന്നെ സിനിമ വളരെ ഇന്‍സ്പയറിങ് ആയി.

Denis Villeneuve എന്ന സംവിധായകന്റെ Enemy, Arrival എന്നീ ചിത്രങ്ങള്‍ ഇഷ്ടമാണ്. അതുപോലെ Edgar Wright എന്ന സംവിധായകന്റെ സിനിമകള്‍ ഇഷ്ടമാണ്. കോമഡി ഓറിയന്റഡ് ചിത്രങ്ങളാണ് അദ്ദേഹത്തിന്റേത്.

ഇന്ത്യന്‍ സിനിമകളില്‍ വെട്രിമാരന്‍ സിനിമകള്‍ ഭീകര ഇന്‍സ്പിരേഷനാണെനിക്ക്. ഞാന്‍ ഏറ്റവും കൂടുതല്‍ കാണുന്ന ഇന്‍ര്‍വ്യൂസ് അദ്ദേഹത്തിന്റെതാണ്. സിനിമയില്‍ സഞ്ചരിക്കാനുള്ള മോട്ടിവേഷന്‍ ആവശ്യമായി വരുമ്പോള്‍ ഞാന്‍ വെട്രിമാരന്റെ ഇന്റര്‍വ്യൂകള്‍ കാണും. പച്ചയായിട്ടാണ് അദ്ദേഹം സംസാരിക്കുക. ഒട്ടും ഗ്ലോറിഫൈ ചെയ്യാതെ. അതുപോലെ അനുരാഗ് കശ്യപിന്റെ സിനിമകള്‍ ഇഷ്ടമാണ്.

5- കിഷ്‌കിന്ധയുടെ റൈറ്റിങ് പ്രോസസ് നടക്കുമ്പോള്‍ എന്‍ പി നാരായണപിള്ളയുടെ പരിണാമവും, എന്‍ എന്‍ പിള്ളയുടെ ഞാന്‍ തുടങ്ങിയ പുസ്തകങ്ങള്‍ ഭാഷയുടെ/ കമ്മ്യൂണിക്കേഷന്റെ രീതി കൂടുതല്‍ ദൃഢമാക്കാന്‍ റഫര്‍ ചെയ്‌തെന്നു കേട്ടു, സാഹിത്യവുമായുള്ള ബാഹുലിന്റെ കണക്ഷന്‍ എങ്ങനെയാണ് ? അതെത്രത്തോളം സിനിമയുടെ എഴുത്തില്‍ സഹായിക്കുന്നുണ്ട്?

ഒരുപാട് വെറൈറ്റി പുസ്തകങ്ങള്‍ വായിക്കാറില്ല. പക്ഷേ വായിച്ച് ഇഷ്ടപ്പെട്ട പുസ്തകങ്ങള്‍ വീണ്ടും വീണ്ടും വായിക്കാറുണ്ട്. പരിണാമം ഒക്കെ ഒത്തിരി തവണ വായിച്ചിട്ടുള്ള പുസ്തകമാണ്. ഇപ്പോഴു വായിക്കാറുണ്ട്. എന്തെങ്കിലും എഴുതുന്ന സന്ദര്‍ഭത്തില്‍ അതൊരു മോട്ടിവേഷനാണ്. എന്‍ പി നാരായണപിള്ള അതെഴുതിയിരിക്കുന്നത് ഒരു ഗ്രാമറുകളെകുറിച്ചും കോണ്‍ഷ്യസല്ലതെ വളരെ ഫ്രീയായിട്ടാണ്. പരിണാമം പോലെയുള്ള പുസ്തകങ്ങള്‍ കിഷ്‌കിന്ധാ കാണ്ഡം എഴുതുന്ന സമയത്ത് സഹായകരമായിട്ടുണ്ട്. ഇതു വായിച്ച് മറ്റാരെങ്കിലും പരിണാമം വായിക്കുകയാണെങ്കില്‍ അതവര്‍ക്ക് സഹായകരമാകും, അതുകൊണ്ടുകൂടിയാണ് പറഞ്ഞത്.

ജി ആര്‍ ഇന്ദുഗോപന്റെ രചനകളും വായിക്കാറുണ്ട്. അദ്ദേഹത്തിന്റെ തസ്‌ക്കരന്‍ മണിയന്‍ പിള്ളയുടെ ആത്മകഥ ഞാന്‍ തുടര്‍ച്ചയായി വായിക്കുന്നവയില്‍ ഒന്നാണ്. ഭയങ്കര കാഷ്വലും എന്റര്‍ടെയിനിങുമാണ്. ഫിക്ഷനേക്കാള്‍ കൂടുതല്‍ നോണ്‍ ഫിക്ഷനാണ് ഇപ്പോള്‍ വായിക്കാറ്. ചില്‍ഡ്രണ്‍സ് കോമിക്‌സ് ഒന്നും ചെറുപ്പത്തില്‍ തീരെ വായിച്ചിരുന്നില്ല ഇപ്പോള്‍ ക്രോസ് വേള്‍ഡില്‍ ഒക്കെ പോയാല്‍ അതും ശ്രദ്ധിക്കാറുണ്ട്.

6- സിനിമയിലെ അഭിനേതാക്കളുടെ പെര്‍ഫോമന്‍സിലേക്കു വന്നാല്‍, ഏകലവ്യന്‍ പോലെയൊരു സിനിമയില്‍ യുവാവായിരിക്കുമ്പോള്‍ തന്നെ വളരെ ധീരമായി പ്രായമായ ഒരു കഥാപാത്രത്തെ അവതരിപ്പിച്ചിട്ടുള്ള ആളാണ് വിജയരാഘവന്‍. എന്നാല്‍ അദ്ദേഹത്തിന്റെ ആക്റ്റിങ് കപ്പാസിറ്റി മനസ്സിലാക്കാന്‍ പ്രേക്ഷകര്‍ സമയമെടുത്തു എന്ന അഭിപ്രായമുണ്ടോ ?

എനിക്ക് അങ്ങനെ തോന്നിയിട്ടില്ല. കുട്ടേട്ടന്‍ (വിജയരാഘവന്‍) ഒരുപാട് നല്ല കഥാപാത്രങ്ങള്‍ ചെയ്തിട്ടുണ്ട്. കുറച്ചു സീനുകള്‍ മാത്രം അഭിനയിച്ച സിനിമകളിലും, ടിപ്പിക്കല്‍ പോപ്പുലര്‍ പടങ്ങളിലുമെല്ലാം അദ്ദേഹത്തിന്റെ പെര്‍ഫോമന്‍സ് മികച്ചതുതന്നെയാണ്. രാവണപ്രഭുവിലെ മുണ്ടയ്ക്കല് രാജേന്ദ്രൻ പോലെയുള്ള കഥാപാത്രങ്ങൾ ഗംഭീരം ആണെന്ന് എനിക്ക് അഭിപ്രായമുണ്ട്. അതുപോലെ ലീലയിലേതും പൂക്കാലത്തിലേതുമെല്ലാം മികച്ച കഥാപാത്രങ്ങള്‍ തന്നെ. നായകന്റെ റോള്‍ അല്ലെങ്കില്‍ മെയിന്‍ റോള്‍ എന്നതിലുപരി വ്യത്യസ്തമായ കഥാപാത്രങ്ങള്‍ ചെയ്യാന്‍ സാധിക്കുക എന്നതാണ് തനിക്കും താല്‍പ്പര്യം എന്ന് കുട്ടേട്ടന്‍ തന്നെ പറഞ്ഞിട്ടുണ്ട്.

7-എഴുതുന്ന സമയത്ത് വിജയരാഘവനെ തന്നെയായിരുന്നോ അപ്പുപിള്ള എന്ന കഥാപാത്രത്തിന്റെ സ്ഥാനത്ത് മനസ്സില്‍ കണ്ടിരുന്നത് ?

അല്ല. എഴുതുന്ന സമയത്ത് അങ്ങനെ ആലോചിച്ചിട്ടില്ല. അങ്ങനെ ഒരാളെ ആലോചിച്ചു കഴിഞ്ഞാന്‍ അവരുടെ സ്ഥിരം ശൈലികളും രീതികളുമെല്ലാം മനസ്സില്‍ കണ്ട് ആ മീറ്ററിലേക്ക് എഴുത്ത് ട്യൂണ്‍ ആയിപ്പോകാന്‍ സാധ്യതയുണ്ട്. ആ സ്വാധീനം വരാതിരിക്കാന്‍ വേണ്ടി എനിക് ആക്‌സസ് ഉള്ള ആരെയും കഥാപാത്രങ്ങളായി ആലോചിച്ചില്ല. എഴുത്തെല്ലാം പൂര്‍ത്തിയായി സിനിമയാക്കാന്‍ ഉദ്ദേശിക്കുകയാണെങ്കില്‍ മാത്രം ഇത്തരം കാര്യങ്ങള്‍ നോക്കാം എന്നാണ് വിചാരിച്ചിരുന്നത്. എന്‍ എന്‍ പിള്ള സാറിനെയാണ് എഴുതിക്കൊണ്ടിരിക്കുമ്പോള്‍ ഒരു ഡ്രൈവ് കിട്ടാനായി അപ്പുപിള്ളയുടെ സ്ഥാനത്ത് മനസ്സില്‍ കണ്ടത്, ഒരു ഫിഗര്‍ എന്ന രീതിയില്‍ മാത്രം.

8- സിനിമയില്‍ ആസിഫ് അലിയുടെ പ്രകടനം ഗംഭീരമായിരുന്നു. അദ്ദേഹത്തിന്റെ ഒരു ടേണിങ് പോയിന്റായിരിക്കും ഈ സിനിമ എന്നുള്ള വിലയിരുത്തലുകള്‍ വന്നിട്ടുണ്ട്. തലവനില്‍ നിന്നും അഡിയോസ് അമിഗോയില്‍ നിന്നൊക്കെ വളരെ വ്യത്യസ്തമായിട്ടുള്ള Complex nature ഉള്ള ഒരു കഥാപാത്രമാണ് കിഷ്‌കിന്ധാ കാണ്ഡത്തില്‍ ആസിഫിന്റേത്. എങ്ങനെയാണ് ആസിഫ് എന്ന നടനെ വിലയിരുത്തുന്നത്.

ആസിഫ്ക്കയെ ജഡ്ജ് ചെയ്യാനുള്ള വളര്‍ച്ച എനിക്കില്ല. ഞാന്‍ സിനിമയില്‍ വന്നിട്ട് അഞ്ച് വര്‍ഷമെ ആയിട്ടുള്ളു. ആസിഫ്ക്ക പതിനഞ്ച് വര്‍ഷമായി ഇന്റസ്ട്രിയിലുള്ള വ്യക്തിയാണ്. അദ്ദേഹത്തിന്റെ ആദ്യത്തെ സിനിമയായ ഋതു ഞാന്‍ ഇന്നും എടുത്ത് കാണാറുള്ള സിനിമയാണ്. ബൈസിക്കിള്‍ തീവ്‌സ് ഞാന്‍ വളരെയധികം ആസ്വദിച്ച സിനിമയാണ്. കാലഘട്ടത്തിനും പക്വതയ്ക്കും പ്രായത്തിനുമൊക്കെ അനുസരിച്ചുള്ള വ്യത്യസ്ത കഥാപാത്രങ്ങളാണ് അദ്ദേഹം ചെയ്തിട്ടുള്ളത്. അത് വളരെ സ്വാഭാവികമായി നടന്നുപോകുന്നു എന്നാണ് തോന്നിയിട്ടുള്ളത്. ഹണി ബീ എന്ന സിനിമ യൂത്ത് ബ്ലാസ്റ്റ് എന്ന രീതിയില്‍ എന്‍ജോയ് ചെയ്തിട്ടുണ്ട്. കക്ഷി അമ്മിണിപിള്ള, കെട്ട്യോളാണെന്റെ മാലാഖ, ഉയരെ എന്നീ സിനിമകളൊക്കെ ഓര്‍ഗാനിക്കലി സംഭവിച്ചിട്ടുള്ളതും വളരെ നല്ല സിനിമകളുമാണ്.

9-ഛായാഗ്രാഹകന്‍ എന്ന നിലയില്‍ പരിശോദിക്കുമ്പോള്‍ കക്ഷി അമ്മിണിപ്പിള്ള, മോഹന്‍കുമാര്‍ ഫാന്‍സ്, ഇന്നലെ വരെ പോലെയുള്ള സിനിമകളില്‍ നിന്നും ഏറെ വിഭിന്നമായ ഒരു പ്ലോട്ട് ആണ് കിഷ്‌ക്കിന്ധായുടേത്, ആദ്യ തിരക്കഥ ഇത്തരത്തില്‍ പല നിരൂപകരും പറഞ്ഞത് പോലെ ഒരു യൂണിവേഴ്‌സല്‍ സബ്ജക്ട് ആയിരിക്കണം എന്ന് നിര്‍ബന്ധം ഉണ്ടായിരുന്നോ ?

ഇല്ല. അത്തരത്തിലുള്ള ഉദ്ദേശങ്ങള്‍ ഒന്നും ഉണ്ടായിരുന്നില്ല. നടക്കുമെങ്കില്‍ നടക്കട്ടെ എന്നേ വിചാരിച്ചുള്ളു. വ്യക്തിപരമായി, ഷൂട്ട് ചെയ്യാനും കാണാനും താത്പര്യമുള്ള രീതിയില്‍ വര്‍ക്ക് ചെയ്യാനാണ് ശ്രമിച്ചിട്ടുള്ളത്. സ്‌ക്രീന്‍പ്ലേയുടെ സ്ട്രക്ച്ചറിനെ സംബന്ധിച്ചോ, ഫിലിം ഗ്രാമറുകളെ കുറിച്ചോ ഒന്നും എനിക്ക് അറിവില്ലായിരുന്നു. അത്തരം പുസ്തകങ്ങള്‍ വായിക്കുകയോ, യൂട്യൂബ് ട്യൂട്ടോറിയലുകള്‍ കാണുകയോ ഒന്നും ഉണ്ടായിട്ടില്ല. അത്തരം കാര്യങ്ങള്‍ അറിയാതിരുന്നത് ഒരു ഫ്രീഡം ആണെന്ന് തോന്നാറുണ്ട്. ഒന്നിനെപറ്റിയും കോണ്‍ഷ്യസാവണ്ട. റൂളുകളെക്കുറിച്ചറിഞ്ഞാല്‍ മാത്രമല്ലെ ആ റൂളുകള്‍ പാലിക്കുന്നുണ്ടോ എന്ന് ടെന്‍ഷനടിക്കേണ്ടതുള്ളു. ശരിയായില്ലെങ്കിലും കുഴപ്പമില്ല, എനിക്ക് തോന്നുന്നതുപോലെ ചെയ്തുനോക്കാം എന്നേ ഉദ്ദേശിച്ചിട്ടുള്ളു.

10- വരാനിരിക്കുന്ന പ്രോജക്ടുകള്‍, സംവിധായകന്‍ എന്ന നിലയില്‍ കാണാന്‍ സാധിക്കുമോ ?

വരാനിരിക്കുന്ന പ്രൊജക്ട് കേരള ക്രൈം ഫയല്‍സ് എന്ന ഹോട്ട് സ്റ്റാറിന്റെ വെബ് സിരീസ് സീസണ്‍ 2 ആണ്. അതിന്റെ കഥ, തിരക്കഥ, സംഭാഷണം നിര്‍വഹിച്ചിട്ടുണ്ട്. സീസണ്‍ 1 മറ്റൊരാളാണ് ചെയ്തത്. നിലവില്‍ സീസണ്‍ 2 ന്റെ ഷൂട്ടിങ്ങ് പൂര്‍ത്തിയായി. അതാണ് ഇനി റിലീസ് ചെയ്യാനിരിക്കുന്നത്. മറ്റു വര്‍ക്കുകള്‍ ഡിക്ലയര്‍ ചെയ്യാനുള്ള രീതിയിലേക്ക് കാര്യങ്ങളെത്തിയിട്ടില്ല. ഇനി കുറച്ചു ദിവസങ്ങള്‍ സമാധാനത്തോടെ വീട്ടില്‍ പോയിരിക്കണമെന്നുണ്ട്. നിലവില്‍ പ്രത്യേകിച്ച് പ്ലാനുകളൊന്നുമില്ല.

ഡയറക്ഷനെ സംബന്ധിച്ച് നിലവില്‍ ഒരു പ്ലാനുമില്ല. ഡയറക്ഷന്റെ ക്രിയേറ്റീവ് സൈഡ് എനിക്കിഷ്ടമാണ്. അതായത് ഷൂട്ടിങ് സമയത്തെ ഡയറക്ഷന്‍. ഷൂട്ടുവരെ സിനിമ എത്തിക്കുന്ന ഒന്ന്- രണ്ട് വര്‍ഷത്തെ വലിയ ഒരു മാനേജ്‌മെന്റ് പ്രൊസസ് ഉണ്ട്. ആ പ്രൊസസിനോട് ഒരു താല്‍പര്യക്കുറവുണ്ട്. അതുകൊണ്ടു തന്നെ നിലവില്‍ പ്ലാനിങ്ങുകളില്ല. പക്ഷേ സിനിമയില്‍ നിരന്തരം ഹാര്‍ഡ് വര്‍ക്ക് ചെയ്യുന്ന സംവിധായകരോട് വലിയ ബഹുമാനമുണ്ട്. അതൊരു ചെറിയ പരിപാടിയല്ല. നല്ല ക്ഷമവേണ്ടുന്ന ജോലിയാണ്. ടെക്‌നിക്കല്‍ പരിപാടികൾ പോലെയല്ല. ചലഞ്ചിങ് ആണ്.