അന്തരിച്ച പ്രശസ്ത സാഹിത്യകാരന്‍ എംടി വാസുദേവന്‍ നായര്‍ക്ക് ഇന്ന് സാംസ്‌കാരിക കേരളം വിടചൊല്ലും. കാലം അടയാളപ്പെടുത്തിയ ചരിത്രപുരുഷനായി നിളയുടെ കഥാകാരന്‍ ഇനി മലയാളികളുടെ ഓര്‍മകളില്‍ ജീവിക്കും. ഇന്ന് അഞ്ച് മണിയോടെ കോഴിക്കോട് മാവൂര്‍ റോഡ് ശ്മശാനത്തില്‍ എംടിയെ സംസ്‌കരിക്കും. മലയാളത്തിന്‍റെ അക്ഷര വെളിച്ചത്തിന് ആദരം അര്‍പ്പിക്കാനെത്തിയ മുഖ്യമന്ത്രി പിണറായി വിജയന്‍ കുടുംബത്തെ ആശ്വസിപ്പിച്ചു. പ്രമുഖ നടൻ മോഹൻലാൽ, ടൂറിസം വകുപ്പ് മന്ത്രി മുഹമ്മദ് റിയാസ് ഉൾപ്പെടെ സമൂഹത്തിന്‍റെ നാനാതുറകളില്‍ നിന്നുളളവര്‍ എംടിക്ക് അന്ത്യാജ്ഞലി അര്‍പ്പിച്ചു. മലയാള സാഹിത്യത്തെ ലോകസാഹിത്യത്തിന്‍റെ നെറുകയിൽ എത്തിച്ച പ്രതിഭയെയാണ് എം ടിയുടെ വിയോഗത്തിലൂടെ നമുക്ക് നഷ്ടമായിരിക്കുന്നതെന്നാണ് മുഖ്യമന്ത്രി പിണറായി വിജയൻ പറഞ്ഞു.
രചനാ സൗകുമാര്യത്താൽ മലയാള സാഹിത്യത്തിലും സിനിമയിലും വീരഗാഥകൾ സൃഷ്‌ടിച്ച എം ടി കഥാകൃത്ത്‌, നോവലിസ്‌റ്റ്‌ , തിരക്കഥാകൃത്ത്‌, സംവിധായകൻ, പത്രാധിപർ, പ്രഭാഷകൻ എന്നീ നിലകളിൽ സാഹിത്യ– കലാ– സാംസ്‌കാരിക മണ്ഡലങ്ങളിലെല്ലാം പ്രതിഭാസുഗന്ധം പരത്തി. തിരൂരിലെ തുഞ്ചൻ സ്‌മാരക ട്രസ്‌റ്റിന്റെ ചെയർമാനാണ്‌. രാജ്യത്തെ ഉന്നത സാഹിത്യ ബഹുമതിയായ ജ്ഞാനപീഠം , പത്മഭൂഷൺ പുരസ്‌കാരം, കേരളസർക്കാരിന്റെ പരമോന്നത പുരസ്‌കാരമായ പ്രഥമ കേരളജ്യോതി പുരസ്‌കാരം, എഴുത്തച്ഛൻ പുരസ്‌കാരം, വയലാർ അവാർഡ്‌ തുടങ്ങി ഇരുന്നൂറിലിധികം ബഹുമതികൾ അക്ഷരകലയാൽ കൈരളിയെ ധന്യമാക്കിയ എഴുത്തുകാരന്‌ ലഭിച്ചിട്ടുണ്ട്‌. തിരക്കഥയെഴുതി സംവിധാനംചെയ്‌ത ആദ്യ സിനിമ ‘നിർമ്മാല്യ’ത്തിന്‌ സുവർണ കമലം സ്വന്തമാക്കി. അവസാനമായി ഒമ്പത്‌ സിനിമകളുടെ സമാഹാരം ‘മനോരഥങ്ങൾ’ ഓണസമ്മാനമായി പുറത്തിറങ്ങി.
