സിലിക്കൺ വാലിയിലെ ഏറ്റവും പ്രബലമായ ശബ്ദങ്ങളിലൊന്നാണ് പീറ്റർ ആൻഡ്രിയാസ് റ്റീൽ. ലോകത്തിലെ ഏറ്റവും വലിയ സംരംഭകരിലും വ്യവസായ നിക്ഷേപകരിലും ഒരാളായ പീറ്റർ റ്റീൽ പ്രമുഖ ധനകാര്യ സ്ഥാപനമായ പേപാൽ, പലൻറിർ ടെക്നോളജീസ്, ഫൗണ്ടേഴ്സ് ഫണ്ട് തുടങ്ങിയവയുടെ സഹസ്ഥാപകനും സിഇഒയുമാണ്. ഇതിനു പുറമേ ഫേസ്ബുക്കിലെ ആദ്യകാല നിക്ഷേപകനയായ പീറ്റർ രാഷ്ട്രീയ രം​ഗത്തും സജീവമായിരുന്നു.

1967 ഒക്ടോബർ 11ന് പശ്ചിമ ജർമ്മനിയിലെ ഫ്രാങ്ക്ഫർട്ട് ആം മെയ്നിലാണ് പീറ്റർ റ്റീൽ ജനിച്ചത്. അ​ദ്ദേ​ഹത്തിന് ഒരു വയസ്സുള്ളപ്പോൾ കുടുംബം അമേരിക്കയിലേക്ക് കുടിയേറുകയും പിന്നീട് കാലിഫോർണിയയിൽ സ്ഥിരതാമസമാക്കുകയും ചെയ്തു. സ്റ്റാൻഫോർഡ് സർവകലാശാലയിൽ തത്ത്വചിന്തയിൽ ബിരുദം നേടിയ പീറ്റർ പിന്നീട് സർവകലാശാലയുടെ നിയമ സ്കൂളിലും ചേർന്നു. 1987-ൽ, അദ്ദേഹം യാഥാസ്ഥിതിക മാസികയായ സ്റ്റാൻഫോർഡ് റിവ്യൂ ആരംഭിച്ചു. പിന്നീട്, സാങ്കേതിക നിക്ഷേപകനായ ഡേവിഡ് സാക്സുമായി ചേർന്ന് യാഥാസ്ഥിതിക വിഷയങ്ങൾ ഉൾക്കൊള്ളുന്ന “ദി ഡൈവേർസിറ്റി മിത്ത്” എന്ന പുസ്തകവും രചിച്ചു.

അഭിഭാഷകനായും വ്യവസായിയായും കുറച്ചുകാലം പ്രവർത്തിച്ച ശേഷം, 1998 ൽ പേപാൽ സ്ഥാപിച്ച് പീറ്റർ സാങ്കേതിക വ്യവസായത്തിൽ തൻ്റെ വ്യക്തിമുദ്ര പതിപ്പിച്ചു. ഇതേസമയത്താണ്, ഇലോൺ മസ്ക്, കീത്ത് റാബോയിസ്, ഡേവിഡ് സാക്സ്, റീഡ് ഹോഫ്മാൻ തുടങ്ങിയവരടങ്ങുന്ന സാങ്കേതികവിദ്യാ രം​ഗത്തെ വളരെ സ്വാധീനമുള്ള കൂട്ടായ്മയായ പേപാൽ മാഫിയയുടെ “ഡോൺ” എന്ന പദവിയും അ​ദ്ദേഹത്തെ തേടിയെത്തിയത്. പീറ്റർ റ്റീലിന്റെ സാമ്പത്തിക പുരോ​ഗതിയുടെ തുടക്കവും അവിടെ നിന്നായിരുന്നു. ഫേസ്ബുക്ക്, ലിങ്ക്ഡ്ഇൻ, യെൽപ് എന്നിവയിലെ ആദ്യകാല നിക്ഷേപങ്ങളും ഫെഡറൽ ഗവൺമെന്റുമായി പലപ്പോഴും സഹകരിക്കുന്ന ബിഗ് ഡാറ്റ കമ്പനിയായ പലൻറിറിന്റെ സഹസ്ഥാപകൻ എന്ന നിലയിലും പീറ്ററും അദ്ദേഹത്തിന്റെ സമ്പത്തും വളർന്നു.

സാങ്കേതിക മേഖലയിലേക്ക് കടക്കുന്നതിന് മുൻപ് പീറ്റർ ഒരു അപ്പീൽ ജഡ്ജിയുടെ ഗുമസ്തനായി ജോലി ചെയ്തിരുന്നു. യുഎസ് സുപ്രീം കോടതി ജസ്റ്റിസ് ആന്റണി കെന്നഡി, ജസ്റ്റിസ് അന്റോണിൻ സ്കാലിയ എന്നിവരുടെ ക്ലാർക്ക് പദവിയിലേക്കുള്ള അഭിമുഖത്തിൽ പങ്കെടുത്തെങ്കിലും വിജയിച്ചില്ല. 2004-ൽ പീറ്റർ റ്റീലും അലക്സാണ്ടർ കാർപ്പും ചേർന്ന് ക്രിമിനൽ സ്വഭാവം തിരിച്ചറിയുന്നതിനായി ചിത്രങ്ങൾ, വീഡിയോകൾ, വിവിധ ഡാറ്റകൾ എന്നിവ വിശകലനം ചെയ്യാൻ കഴിവുള്ള പലൻറിർ എന്ന കമ്പനി സ്ഥാപിച്ചു. തീവ്രവാദ പ്രവർത്തനങ്ങൾ നിരീക്ഷിക്കാൻ സാമ്പത്തിക വ്യവസായത്തിലെ വഞ്ചന-കണ്ടെത്തൽ സോഫ്റ്റ്വെയർ ഉപയോഗിക്കുക എന്ന റ്റീലിന്റെ ആശയത്തെ അടിസ്ഥാനമാക്കിയുള്ളതായിരുന്നു ഇത്. 2004 ൽ തന്നെയാണ് 10 ശതമാനം ഓഹരികൾക്ക് 500,000 ഡോളർ നൽകി ഫേസ്ബുക്കിലെ ആദ്യത്തെ ബാഹ്യ നിക്ഷേപകനായി റ്റീൽ ബോർഡിൽ ചേർന്നത്.

2005-ൽ, പീറ്റർ 50 ദശലക്ഷം യുഎസ് ഡോളർ ആസ്ഥിയുള്ള വെഞ്ച്വർ ക്യാപിറ്റൽ (വി സി) സ്ഥാപനമായ ദി ഫൗണ്ടേഴ്സ് ഫണ്ട് സ്ഥാപിച്ചു. സ്പേസ് എക്സ്, എയർബിഎൻബി എന്നിവയിൽ ഫൗണ്ടേഴ്സ് ഫണ്ട് നിക്ഷേപം നടത്തിയിട്ടുണ്ട്. ഫൗണ്ടേഴ്സ് ഫണ്ടിന് പുറമെ മിഥ്രിൽ ക്യാപിറ്റൽ മാനേജ്മെന്റ്, വലർ വെഞ്ച്വേഴ്സ് എന്നിവയുൾപ്പെടെ 20 ബില്യൺ ഡോളർ നിക്ഷേപം കൈകാര്യം ചെയ്യുന്ന നിരവധി സ്ഥാപനങ്ങളും അദ്ദേഹം സ്ഥാപിച്ചു. സാൻ ഫ്രാൻസിസ്കോയിലും ന്യൂയോർക്കിലും ഓഫീസുകളുള്ള ആഗോള മാക്രോ ഹെഡ്ജ് ഫണ്ടായ ക്ലാരിയം ക്യാപിറ്റൽ മാനേജ്മെന്റിന്റെ പ്രസിഡന്റാണ് പീറ്റർ റ്റീൽ. കൂടാതെ, Art.cy, മൊബൈൽ ഗെയിം ഡെവലപ്പർ സിങ്ക, ട്രംപിന്റെ മരുമകൻ ജാരെഡ് കുഷ്നറുടെ സഹോദരൻ ജോഷ് കുഷ്നർ സ്ഥാപിച്ച ആരോഗ്യ ഇൻഷുറൻസ് സ്ഥാപനമായ ഓസ്കാർ എന്നിവയുൾപ്പെടെ നിരവധി സ്ഥാപനങ്ങളിൽ അദ്ദേഹം നേരിട്ട് നിക്ഷേപം നടത്തിയിട്ടുണ്ട്.

ബുദ്ധിജീവികൾ, രാഷ്ട്രീയ നേതാക്കൾ, ബിസിനസ് എക്സിക്യൂട്ടീവുകൾ എന്നിവരുടെ സ്വകാര്യ, വാർഷിക ഒത്തുചേരലായ ബിൽഡർബർഗ് ഗ്രൂപ്പിന്റെ സ്റ്റിയറിംഗ് കമ്മിറ്റി അംഗവുമാണ് പീറ്റർ. 2024 ജൂലൈയിലെ ബ്ലൂംബെർഗ് കണക്കനുസരിച്ച് 11.2 ബില്യൺ യുഎസ് ഡോളർ ആസ്തിയുള്ള പീറ്റർ ശതകോടീശ്വരന്മാരുടെ സൂചികയിൽ 212-ാം സ്ഥാനത്താണ്. 20 വയസ്സിന് താഴെയുള്ള 20 വ്യക്തികൾക്ക് അവരുടെ ബിസിനസ്സ് ആരംഭിക്കാൻ 100,000 ഡോളറും രണ്ട് വർഷത്തെ സഹായവും നൽകുക എന്ന ലക്ഷ്യത്തോടെ 2011 ൽ റ്റീൽ ഫെലോഷിപ്പിനും അ​ദ്ദേഹം തുടക്കും കുറിച്ചു.

യാഥാസ്ഥിതിക സ്വന്തന്ത്രവാദിയെന്നാണ് പീറ്റർ റ്റീൽ സ്വയം വിശേഷിപ്പിക്കുന്നത്. 2010 കളുടെ അവസാനം മുതൽ അദ്ദേഹം ദേശീയ യാഥാസ്ഥിതികതയ്ക്ക് പിന്തുണ നൽകുകയും സ്വതന്ത്ര വ്യാപാരത്തോടും വൻകിട സാങ്കേതികവിദ്യയോടുമുള്ള സാമ്പത്തിക ഉദാര മനോഭാവത്തെ വിമർശിക്കുകയും ചെയ്തു. തൻ്റെ വ്യക്തിപരമായ രാഷ്ട്രീയ പരിണാമത്തെക്കുറിച്ച് 2009 ലെ ഒരു ലേഖനത്തിൽ, സ്വാതന്ത്ര്യവും ജനാധിപത്യവും പൊരുത്തപ്പെടുന്നുവെന്ന് ഞാൻ ഇനി വിശ്വസിക്കുന്നില്ലെന്ന് പീറ്റർ വിവരിച്ചിരുന്നു. സ്ത്രീകൾക്ക് വോട്ടവകാശം നൽകുന്നതും ക്ഷേമ സ്വീകർത്താക്കളുടെ എണ്ണം വർദ്ധിപ്പിക്കുന്നതും ലിബർട്ടേറിയൻ സ്ഥാനാർത്ഥികളുടെ തിരഞ്ഞെടുപ്പ് സങ്കീർണ്ണമാക്കിയെന്ന് പീറ്റർ വാദിച്ചു. എന്നാൽ സ്ത്രീകളുടെ വോട്ടവകാശം റദ്ദാക്കുന്നതിനെ താൻ അംഗീകരിക്കുന്നില്ലെന്ന് അദ്ദേഹം പിന്നീട് വ്യക്തമാക്കി. സ്വവർഗ്ഗാനുരാഗിയായ പീറ്റർ റ്റീൽ, അമേരിക്കൻ ഫൗണ്ടേഷൻ ഫോർ ഇക്വൽ റൈറ്റ്സ്, ജിഒ പ്രൗഡ് തുടങ്ങിയ യാഥാസ്ഥിതിക സ്വവർഗ്ഗാനുരാഗ അവകാശങ്ങളെ പിന്തുണച്ചിട്ടുണ്ട്.

കഴിഞ്ഞ രണ്ട് പതിറ്റാണ്ടുകളായി, യാഥാസ്ഥിതിക, ലിബർട്ടേറിയൻ ഫെഡറലിസ്റ്റ് സൊസൈറ്റിയുടെ പരിപാടികളിൽ അദ്ദേഹം നിരവധി തവണ സംസാരിച്ചിട്ടുണ്ട്. 2007 ഡിസംബറിൽ പീറ്റർ, റോൺ പോളിനെ പ്രസിഡന്റ് സ്ഥാനത്തേക്ക് പിന്തുണച്ചിരുന്നു. എന്നാൽ റിപ്പബ്ലിക്കൻ നാമനിർദ്ദേശം നേടുന്നതിൽ പോൾ പരാജയപ്പെട്ടതിനുശേഷം, ജോൺ മക്കെയ്ന് പ്രചാരണത്തിന് സംഭാവന നൽകി. 2010ൽ കാലിഫോർണിയ ഗവർണർ സ്ഥാനത്തേക്ക് മത്സരിച്ച് പരാജയപ്പെട്ട മെഗ് വിറ്റ്മാനെയും പീറ്റർ പിന്തുണച്ചു. അവരുടെ പ്രചാരണത്തിനായി 25,900 ഡോളറും അദ്ദേഹം സംഭാവന ചെയ്തിരുന്നു. 2016 ലെ ജിഒപി പ്രസിഡൻഷ്യൽ പ്രൈമറി തിരഞ്ഞെടുപ്പിൽ കാർലി ഫിയോറിനയുടെ പ്രചാരണത്തെ റ്റീൽ തുടക്കത്തിൽ പിന്തുണച്ചിരുന്നു. ഫിയോറിന പിന്മാറിയതിനുശേഷം, റ്റീൽ ഡൊണാൾഡ് ട്രംപിനെ പിന്തുണയ്ക്കുകയും ട്രംപിന്റെ നാമനിർദ്ദേശത്തിനുള്ള കാലിഫോർണിയ പ്രതിനിധികളിൽ ഒരാളായി മാറുകയും ചെയ്തു. ട്രംപിന്റെ പ്രചാരണത്തിനായി കുറഞ്ഞത് 1.25 മില്യൺ ഡോളർ സംഭാവന നൽകുകയും ചെയ്തിരുന്നു. സ്ത്രീകളെക്കുറിച്ച് ട്രംപ് അശ്ലീല പരാമർശങ്ങൾ നടത്തുന്ന വീഡിയോ പുറത്തുവന്ന് ആഴ്ചകൾക്ക് ശേഷമാണ് സംഭാവന നൽകിയത്.

ട്രംപിന്റെ വിജയത്തിന് ശേഷം, നിയുക്ത പ്രസിഡൻ്റിൻ്റെ നിർവാഹക സമതിയിലേക്ക് റ്റീലിനെ നിർദ്ദേശിച്ചിരുന്നു. 2018 ജൂലൈയിൽ, ഇടക്കാല തിരഞ്ഞെടുപ്പിലും ട്രംപിന്റെ 2020 ലെ പുനർ തിരഞ്ഞെടുപ്പ് പ്രചാരണത്തിലും റിപ്പബ്ലിക്കൻ നാഷണൽ കമ്മിറ്റിയെ പിന്തുണയ്ക്കുന്നതിനായി അദ്ദേഹം ട്രംപ് വിക്ടറി കമ്മിറ്റിക്ക് 250,000 ഡോളർ സംഭാവന നൽകി. 2022 ഫെബ്രുവരിയോടെ, ആ വർഷത്തെ തിരഞ്ഞെടുപ്പ് പ്രചാരണത്തിൽ റിപ്പബ്ലിക്കൻ സ്ഥാനാർത്ഥികൾക്ക് ഏറ്റവും കൂടുതൽ സംഭാവന നൽകിയവരിൽ ഒരാളായിരുന്നു റ്റീൽ. കൂടാതെ, കർശനമായ അതിർത്തി നിയന്ത്രണം, നിയന്ത്രിത കുടിയേറ്റ നയം, മുതിർന്ന പൗരൻമാർക്കായി പ്രത്യേക ഫണ്ടുകൾ, ബാഹ്യ ഇടപെടൽ രഹിത വിദേശ നയം എന്നിവയെ പിന്തുണയ്ക്കുന്ന സ്ഥാനാർത്ഥികളെ പിന്തുണയ്ക്കാൻ ഫ്രീ ഫോറെവർ എന്ന പേരിൽ പീറ്ററിന് സ്വന്തമായി രാഷ്ട്രീയ പ്രവർത്തന സമിതിയുമുണ്ട്. 2022ൻ്റെ മധ്യത്തിൽ ട്രംപ് അനുകൂല സ്ഥാനാർത്ഥികളെ പിന്തുണയ്ക്കുന്നതിനായി പീറ്റർ മെറ്റാ ബോർഡിൽ നിന്ന് പിന്മാറിയിരുന്നു.

ആയുസ്സ് വർദ്ധിപ്പിക്കുക എന്ന ലക്ഷ്യത്തോടെ സാങ്കേതികവിദ്യയിലും ശാസ്ത്ര രം​ഗത്തും പീറ്റർ റ്റീൽ വളരെയധികം നിക്ഷേപം നടത്തിയിട്ടുണ്ട്. ആന്റി ഏജിംഗ് ശാസ്ത്രജ്ഞനായ ഔബ്രി ഡി ഗ്രേയുടെ ഗവേഷണത്തിനായി 56കാരനായ പീറ്റർ ദശലക്ഷക്കണക്കിന് ഡോളർ നിക്ഷേപിച്ചതായി റിപ്പോർട്ടുണ്ട്. സാങ്കേതികവിദ്യ അനുവദിക്കുമ്പോൾ ജീവൻ തിരികെ ലഭിക്കുമെന്ന പ്രതീക്ഷയോടെ, മരണശേഷം ക്രയോജെനിക് രീതിയിൽ സംരക്ഷിക്കപ്പെടാനും രജിസ്റ്റർ ചെയ്തിട്ടുണ്ട്.

ബ്ലൂംബെർഗ് റിപ്പോർട്ട് പ്രകാരം, പീറ്റർ റ്റീലിന് ഏകദേശം 8 ബില്യൺ ഡോളർ ആസ്തിയുണ്ട്. 2008 ഏപ്രിൽ 15 ന്, പാട്രി ഫ്രീഡ്മാന്റെ നേതൃത്വത്തിൽ രൂപീകരിച്ച സീസ്റ്റെഡിംഗ് ഇൻസ്റ്റിറ്റ്യൂട്ടിന് തീൽ 500,000 ഡോളർ വാഗ്ദാനം ചെയ്തു. വിവിധ സാമൂഹിക, രാഷ്ട്രീയ, നിയമ സംവിധാനങ്ങളുമായി പരീക്ഷണങ്ങളും നവീകരണവും സുഗമമാക്കുന്ന സ്ഥിരവും സ്വയംഭരണപരവുമായ സമുദ്ര സമൂഹങ്ങളെ സൃഷ്ടിക്കുക എന്നതാണ് ഇതിന്റെ ലക്ഷ്യം. അതേസമയം, 2011 ൽ സീസ്റ്റെഡിംഗ് ഇൻസ്റ്റിറ്റ്യൂട്ടിന് 1.25 മില്യൺ ഡോളർ നൽകിയെങ്കിലും ഈ സംവിധാനം പ്രായോ​ഗികമല്ലെന്ന് പറഞ്ഞ് അതേ വർഷം തന്നെ ബോർഡിൽ നിന്ന് രാജിവയ്ക്കുകയും ചെയ്തു.

2006ൽ സംരംഭകത്വത്തിനുള്ള ഹെർമൻ ലേ അവാർഡ് പീറ്റർ റ്റീൽ നേടി. 2007ൽ വേൾഡ് ഇക്കണോമിക് ഫോറം അദ്ദേഹത്തെ 40 വയസും അതിൽ താഴെയുമുള്ള 250 പ്രമുഖ നേതാക്കളിൽ ഒരാളായി യംഗ് ഗ്ലോബൽ ലീഡറായി ആദരിച്ചു. 2009 നവംബർ 7 ന് ഗ്വാട്ടിമാലൻ യൂണിവേഴ്സിഡാഡ് ഫ്രാൻസിസ്കോ മരോക്വിനിൽ നിന്ന് ഓണററി ബിരുദം ലഭിച്ചു. 2012-ൽ, കോളേജ് കാമ്പസുകളിൽ ലിബർട്ടേറിയൻ ആദർശങ്ങൾ പ്രചരിപ്പിക്കുന്നതിനായി സമർപ്പിച്ചിരിക്കുന്ന സ്റ്റുഡന്റ്സ് ഫോർ ലിബർട്ടി എന്ന സംഘടന ആ വർഷത്തെ പൂർവ വിദ്യാർത്ഥി അവാർഡ് നൽകി ആദരിച്ചു. 2013 ഫെബ്രുവരിയിൽ, വെഞ്ച്വർ ക്യാപിറ്റലിസ്റ്റിനുള്ള ടെക്ക്രഞ്ച് ക്രഞ്ചി അവാർഡും അദ്ദേഹത്തിന് ലഭിച്ചു.