ജയിലിലെ തടവുകാരന് മകളുടെ വിവാഹം വിർച്വലായി കാണാന്‍ അവസരമൊരുക്കി ദുബായ് പോലീസ്. വിവാഹ ജീവിതത്തിലേക്ക് കടക്കുന്ന മകളെ കാണണമെന്നും അനുഗ്രഹിക്കണമെന്നുമുളള തടവുകാരന്‍റെ ആഗ്രഹം സാധ്യമാക്കുകയായിരുന്നു ദുബായ് പോലീസ്. ഇതിനായി പ്രത്യേക വീഡിയോ കോണ്‍ഫറന്‍സ് സൗകര്യം ജയിലില്‍ ഒരുക്കി.തടവുകാരന്‍റെ കുടുംബം അദ്ദേഹത്തോട് വ‌ിഡിയോ കോൺഫറൻസിലൂടെ മകളുടെ നിക്കാഹിൽ പങ്കെടുത്ത് ഇലക്‌ട്രോണിക് രീതിയിൽ വിവാഹ കരാറിൽ ഒപ്പിടാൻ അഭ്യർഥിച്ചപ്പോൾ അധികൃതർ അതംഗീകരിച്ച് പെട്ടെന്ന് തന്നെ വേണ്ട സാഹചര്യമൊരുക്കുകയായിരുന്നു.
ദുബായ് പോലീസിലെ ജനറൽ ഡിപ്പാർട്ട്‌മെൻ്റ് ഓഫ് പ്യൂണിറ്റീവ് ആൻഡ് കറക്ഷണൽ എസ്റ്റാബ്ലിഷ്‌മെൻ്റാണ് തടവുകാരന്‍റെ ആഗ്രഹം പരിഗണിച്ചത്.തടവുകാരുടെ മാനുഷികവും വൈകാരികവുമായ ക്ഷേമം പരിഗണിച്ചാണ് അവരുടെ പ്രിയപ്പെട്ടവരുമായി സംവദിക്കാന്‍ അവസരം നല്‍കുന്നതെന്ന് അധികൃതർ പറഞ്ഞു. കുടുംബത്തിന്‍റെ അഭ്യർത്ഥനകൂടി പരിഗണിച്ചായിരുന്നു തീരുമാനം. ഓണ്‍ലൈനിലൂടെ തടവുകാരന് മകളുടെ വിവാഹം കണ്ടു. ഇത്തരത്തിലൊരു അവസരം ഒരുക്കിയതിന് ദുബായ് പോലീസിനോട് നന്ദിയുണ്ടെന്ന് അദ്ദേഹം പ്രതികരിച്ചു.
