സൗദിയിൽ അമീർ മുഹമ്മദ് ബിൻ സൽമാൻ റോയൽ റിസർവിൽ പുതിയ അതിഥിയെത്തി. 1970ലാണ് വേട്ടയാടലും പ്രകൃതിദത്ത ആവാസവ്യവസ്ഥയുടെ നഷ്‌ടവും കാരണം അറേബ്യൻ ഉപഭൂഖണ്ഡത്തിലുടനീളം അറേബ്യാൻ ഒറിക്‌സുകൾ അഥവാ അറേബ്യൻ മാനുകൾക്ക് വംശനാശം സംഭവിച്ചതായി പ്രഖ്യാപിക്കപ്പെട്ടത്. 54 വർഷങ്ങൾക്കിപ്പുറം ഇന്നലെ ആണ് അറേബ്യൻ ഒറിക്സിന്റെ ജനനം അധികൃതർ പുറത്തുവിട്ടത്. റിസർവിൽ ജനിക്കുന്ന 15–ാമത്തെ അറേബ്യൻ ഒറിക്സ് ആണിത്.

2022 അവസാനത്തോടെയാണ് റിസർവിൽ അറേബ്യൻ മാനിനെ സംരക്ഷിക്കുന്നതിനുള്ള പദ്ധതി ആരംഭിച്ചത്. കിരീടാവകാശിയും റിസർവ് ഡെവലപ്‌മെൻറ് അതോറിറ്റിയുടെ ഡയറക്ടർ ബോർഡ് ചെയർമാനുമായ അമീർ മുഹമ്മദ് ബിൻ സൽമാന്‍റെ മേൽനോട്ടത്തിൽ ആരംഭിച്ച സംയോജിത വികസന പദ്ധതിയുടെ ഭാഗമാണ് ഈ പരിപാടി. വന്യജീവികളെ സംരക്ഷിക്കാനുള്ള ശ്രമങ്ങളിലെ സുപ്രധാന നേട്ടമായാണ് 15ാമത് അറേബ്യൻ ഒറിക്‌സിന്റെ പിറവിയെ കാണുന്നതെന്ന് റിസർവ് സി.ഇ.ഒ ആൻഡ്രൂ സലൂമിസ് ഖലീജ് ടൈംസിനോട് പറഞ്ഞു.