ഖത്തറില് സ്കൂള് ബസിനുള്ളില് മലയാളി ബാലിക മരിച്ച സംഭവത്തില് നടപടിയെടുത്ത് ഖത്തര് വിദ്യാഭ്യാസ മന്ത്രാലയം. കുട്ടി പഠിച്ചിരുന്ന ദോഹ അല് വക്റയിലെ സ്പ്രിങ് ഫീല്ഡ് കിന്ഡര് ഗര്ട്ടന് അടച്ചുപൂട്ടാന് വിദ്യാഭ്യാസ മന്ത്രാലയം ഉത്തരവിട്ടു. കെജി1 വിദ്യാര്ത്ഥിയായ മിന്സ മറിയത്തിന്റെ മരണത്തില് സ്കൂള് അധികൃതരില് നിന്നും ഗുരുതര വീഴ്ചയുണ്ടായെന്ന് കണ്ടെത്തിയതിന്റെ അടിസ്ഥാനത്തിലാണ് നടപടി. ഞായറാഴ്ചയാണ് കുട്ടി മരിച്ചത്. കോട്ടയം ചിങ്ങവനം സ്വദേശി കൊച്ചുപറമ്പില് അഭിലാഷ് ചാക്കോ സൗമ്യ ചാക്കോ ദമ്പതികളുടെ ഇളയ മകളാണ് മിന്സ. നേരത്തെ സംഭവത്തിൽ മൂന്ന് ബസ് ജീവനക്കാരെ അറസ്റ്റ് ചെയ്തതായിട്ടാണ് വിവരം. മലയാളി അടക്കമുള്ള ജീവനക്കാരെയാണ് അറസ്റ്റ് ചെയ്തതെന്നാണ് റിപ്പോർട്ടുകൾ. ഇക്കാര്യം ഔദ്യോഗികമായി സ്ഥിരീകരിച്ചിട്ടില്ല
അതെ സമയം കുറ്റക്കാർക്കെതിരെ കർശന നടപടിയെടുക്കുമെന്ന് ഖത്തർ വിദ്യാഭ്യാസ മന്ത്രാലയം അറിയിച്ചു. മിൻസയുടെ വീട്ടിലെത്തി കുടുംബത്തെ വിദ്യാഭ്യാസ മന്ത്രി ബുഥൈന ബിൻത് അലി അൽ നുഐമി ആശ്വസിപ്പിച്ചു. കുടുംബത്തിന് എല്ലാ സഹായവും മന്ത്രി വാഗ്ദാനം ചെയ്തു. രാവിലെ ആറുമണിക്ക് സ്കൂളിലേക്കുള്ള യാത്രാമധ്യേ ബസ്സില് കുട്ടി ഉറങ്ങിപ്പോയെന്നും വിദ്യാര്ത്ഥി മറ്റുള്ളവരോടൊപ്പം ഇറങ്ങാതിരുന്നത് ബസ് ജീവനക്കാരന്റെ ശ്രദ്ധയില് പെട്ടില്ല. ബസ് പരിശോധിക്കാതെ ഡ്രൈവര് വാഹനം ഡോര് ലോക്ക് ചെയ്ത് പോയി. തുറസായ സ്ഥലത്താണ് ബസ് പാര്ക്ക് ചെയ്തിരുന്നത്. ഉച്ചയോടെ വിദ്യാർഥികളെ തിരികെ എത്തിക്കാനായി ബസ് എടുത്തപ്പോഴാണ് കുട്ടിയെ മരിച്ച നിലയിൽ കണ്ടത്.
