യുഎഇ പ്രഖ്യാപിച്ച പൊതുമാപ്പ് ഡിസംബ‍ർ 31 ന് അവസാനിക്കുമെന്നും യാതൊരു കാരണവശാലും സമയം ദീർഗിപ്പിക്കില്ലെന്നും അധികൃതർ അറിയിച്ചു. വിസ കാലാവധി അവസാനിച്ചും രാജ്യത്ത് തങ്ങുന്നവർക്ക് താമസം നിയമാനുസൃതമാക്കാനും അല്ലെങ്കില്‍ രാജ്യം വിടാനുമായാണ് യുഎഇ പൊതുമാപ്പ് പ്രഖ്യാപിച്ചത്. കാലാവധി അവസാനിക്കും മുന്‍പ് താമസം നിയമാനുസൃതമാക്കണം, അല്ലെങ്കില്‍ രാജ്യം വിടണമെന്ന് ജനറല്‍ ഡയറക്ടറേറ്റ് ഓഫ് റെസിഡന്‍സി ആന്‍റ് ഫോറിനേഴ്സ് അഫയേഴ്സ് ( ജിഡിആർഎഫ്എ) അറിയിച്ചു.

2024 സെപ്റ്റംബർ 1 നാണ് യുഎഇ പൊതുമാപ്പ് പ്രഖ്യാപിച്ചത്. രണ്ട് മാസക്കാലയളവില്‍, ഒക്ടോബർ 31 വരെയായിരുന്നു ആദ്യം കാലാവധിയെങ്കിലും, ആവശ്യക്കാരുടെ എണ്ണം കൂടിയതോടെ ഡിസംബർ 31 വരെ നീട്ടുകയായിരുന്നു. അനധികൃതമായി രാജ്യത്ത് തങ്ങുന്നവർക്ക് പിഴയില്ലാതെ താമസരേഖകള്‍ നിയമാനുസൃതമാക്കാനുളള അവസരമാണ് പൊതുമാപ്പ് മുന്നോട്ടുവച്ചത്. അതെ സമയം പൊതുമാപ്പ് ഇതിനകം പതിനായിരക്കണക്കിന് ആളുകള്‍ പ്രയോജനപ്പെടുത്തിയതായി യുഎഇ അധികൃതര്‍ അറിയിച്ചു. കൂടുതല്‍ പേരും തങ്ങളുടെ വിസ സ്റ്റാറ്റസ് ക്രമപ്പെടുത്തി രാജ്യത്ത് തുടരുകയാണ് ചെയ്തത്. കുറച്ചു പേര്‍ മാത്രമാണ് പൊതുമാപ്പ് ഉപയോഗപ്പെടുത്തി പിഴകളൊന്നുമില്ലാതെ രാജ്യം വിട്ടത്.

കാലഹരണപ്പെട്ടതോ റദ്ദാക്കിയതോ ആയ വിസകളില്‍ യുഎഇയില്‍ താമസിക്കുന്ന ആളുകള്‍ക്ക് അവരുടെ വിസ സ്റ്റാറ്റസ് ശരിയാക്കാന്‍ അഭ്യര്‍ത്ഥിക്കാനോ അല്ലെങ്കില്‍ എക്‌സിറ്റ് പെര്‍മിറ്റില്‍ യുഎഇ വിടാനോ കഴിയുന്ന ഒരു ഗ്രേസ് പിരീഡാണ് പൊതുമാപ്പ്.