മുൻ ഇംഗ്ലീഷ് ഫുട്ബാളറും, ലിവർപൂൾ ഇതിഹാസ താരവുമായ സ്റ്റീവൻ ജെറാർഡ് ആസ്റ്റൺ വില്ല ഹെഡ് കോച്ച്. മൂന്നര വർഷത്തേക്കാണ് നിയമനം. റേഞ്ചേഴ്‌സ് എഫ്‌സിയിൽ നിന്നാണ് ജെറാർഡ് വില്ലയിലെത്തുന്നത്. തുടർച്ചയായ അഞ്ചു തോൽവികൾ വഴങ്ങിയതിന് പിന്നാലെ പുറത്താക്കിയ ഡീൻ സ്മിത്തിന് പകരമായാണ് ജെറാർഡ്ന്റെ നിയമനം. ഫസ്റ്റ് ഡിവിഷനിൽനിന്ന് തരംതാഴ്ത്തൽ ഭീഷണി നേരിടുന്ന ആസ്റ്റൺ വില്ല നിലവിൽ 16-ാം സ്ഥാനത്താണ്. ചരിത്രവും പാരമ്പര്യവുമുള്ള ടീമിനെ പരിശീലിപ്പിക്കുന്നതിൽ അങ്ങേയറ്റം അഭിമാനമുണ്ടെന്ന് ജെറാദ് പ്രതികരിച്ചു. ക്ലബിന് വലിയ പദ്ധതികളുണ്ടെന്നും അത് നേടാനായി പരമാവധി യത്‌നിക്കുമെന്നും അദ്ദേഹം കൂട്ടിച്ചേർത്തു.

ലിവർപൂൾ മുൻ നായകനായ ജെറാദ് 710 മത്സരങ്ങളിൽ ക്ലബിനായി ബൂട്ടണിഞ്ഞിട്ടുണ്ട്. ഒമ്പത് കിരീടങ്ങളിലും പങ്കാളിയായി.ലിവർപൂൾ യൂത്ത് അക്കാദമിയെും അണ്ടർ 18 ടീമിനെയും പരിശീലിപ്പിച്ചിട്ടുണ്ട്. 2018 മെയിലാണ് സ്‌കോട്ടിഷ് പ്രീമിയർ ക്ലബ്ബായ റേഞ്ചേഴ്‌സ് എഫ്‌സിയുടെ പരിശീലക പദവി ഏറ്റെടുത്തത്. 193 മത്സരങ്ങളിൽ 125ലും ടീം ജയിച്ചു. 42 കളി സമനിലയിലായി. 26 മത്സരങ്ങളിൽ മാത്രമാണ് ജെറാർഡിന്റെ കുട്ടികൾ തോൽവി അറിഞ്ഞത്. ജെറാർഡിന്റെ സമകാലികരായ ഫ്രാങ്ക് ലാംപാർഡ്, വെയ്ൻ റൂണി തുടങ്ങിയവരും ഇംഗ്ലണ്ടിൽ വിവിധ ക്ലബുകളുടെ കോച്ചുമാരുടെ കുപ്പായം അണിഞ്ഞിട്ടുണ്ട്.