യുഎസിൽ പ്രസിഡന്റ് തിരഞ്ഞെടുപ്പിന് ഉപയോഗിച്ച മൂന്ന് ബാലറ്റ് ഡ്രോപ്പ് ബോക്‌സുകള്‍ തീ പിടിച്ചു നശിച്ചു. വാഷിംഗ്ടണിലെയും ഒറിഗണിലെയും ബാലറ്റ് ഡ്രോപ്പ് ബോക്‌സുകളിലാണ് തീ പിടിത്തമുണ്ടായത്. സംഭവത്തിൽ ഗൂഢാലോചനയുണ്ടെന്ന് സംശയിക്കുന്നതായും ഒറിഗണിൽ സംശയാസ്പദമായ സാഹചര്യത്തിൽ ഒരു വാഹനം തിരിച്ചറിഞ്ഞതായും പൊലീസ് പറഞ്ഞു. പുലർച്ചെ 3:30 ഓടെയാണ്‌ തീപിടിത്തം ഉണ്ടായത്‌. കത്തിയ ബാലറ്റ് ഡ്രോപ്പ് ബോക്സുകളിൽ ബാലറ്റ് നിക്ഷേപിച്ചവർ തെരഞ്ഞെടുപ്പ് ഉദ്യോഗസ്ഥരുമായി ബന്ധപ്പെടണമെന്നും വീണ്ടും വോട്ട് രേഖപ്പെടുത്തണമെന്നും ഉദ്യോഗസ്ഥർ അറിയിച്ചു.
വാഷിംഗ്ടൺ സ്റ്റേറ്റിലെ നിയമപരവും നീതിയുക്തവുമായ തിരഞ്ഞെടുപ്പിനെ തടസ്സപ്പെടുത്താൻ ലക്ഷ്യമിടുന്ന ഭീകരപ്രവർത്തനങ്ങളെ ശക്തമായി അപലപിക്കുന്നുവെന്നും എല്ലാ വോട്ടർമാർക്കും സുരക്ഷിതമായി വോട്ട് രേഖപ്പെടുത്താനും അത് സംരക്ഷിക്കാനുമുള്ള സാഹചര്യം ഉറപ്പ് വരുത്തുമെന്നും സ്റ്റേറ്റ് സെക്രട്ടറി സ്റ്റീവ് ഹോബ്സ് പ്രസ്താവനയിൽ പറഞ്ഞു.
അതെ സമയം നവംബര്‍ അഞ്ചിന് അമേരിക്കന്‍ പ്രസിഡന്റ് തെരഞ്ഞെടുപ്പ് നടക്കാനിരിക്കെ പ്രവചനങ്ങള്‍ അസാധ്യമാക്കുന്ന വിധത്തില്‍ ഇരു സ്ഥാനാര്‍ത്ഥികളും പൊരിഞ്ഞ പോരാട്ടത്തില്‍. റിപ്പബ്ലിക്കന്‍ സ്ഥാനാര്‍ത്ഥി ഡൊണാള്‍ഡ് ട്രംപും ഡെമോക്രാറ്റിക് സ്ഥാനാര്‍ത്ഥി കമലാ ഹാരിസും പ്രചാരണത്തിന്റെ അവസാന ഘട്ടത്തില്‍ വിജയത്തിനായി എല്ലാ അടവുകളും പുറത്തെടുക്കുന്നുണ്ട്. കമല ഹാരിസിന്റെ വിജയത്തിനായി മുന്‍ പ്രസിഡന്റ് ബരാക് ഒബാമയും മിഷേല്‍ ഒബാമയും പ്രചാരണ രംഗത്ത് സജീവമായുണ്ട്. എന്നാല്‍ ഒരിക്കല്‍ കൂടി പ്രസിഡന്റാകുമെന്ന് ഉറച്ച ആത്മവിശ്വാസത്തിലാണ് ട്രംപ്. തന്റെ അവസാന മത്സരമാണിതെന്നും അദ്ദേഹം പ്രഖ്യാപിച്ചിട്ടുണ്ട്.
