പ്രസിഡന്റ് തെരഞ്ഞെടുപ്പില്‍ നിന്ന് പിന്മാറിയത് പാര്‍ട്ടിയെയും രാജ്യത്തെയും ഒന്നിപ്പിക്കുന്നതിനെന്ന് യുഎസ് പ്രസിഡന്റ് ജോ ബൈഡന്‍. രാജ്യത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. പുതിയ തലമുറ നേതൃസ്ഥാനത്തേക്ക് വരണമെന്നും അദ്ദേഹം പറഞ്ഞു. അമേരിക്കന്‍ ജനതയ്‌ക്കൊപ്പം നിലകൊളളുമെന്ന് ബൈഡന്‍ വ്യക്തമാക്കി. രാജ്യത്തെ നയിക്കാന്‍ കഴിയുന്ന കരുത്തുറ്റ നേതാവാണ് കമല ഹാരിസെന്ന് അദ്ദേഹം പറഞ്ഞു. അമേരിക്കയുടെ ജനാധിപത്യം സംരക്ഷിക്കാന്‍ ഒന്നിച്ചു നില്‍ക്കണമെന്നും ആഹ്വാനം ചെയ്തു. മത്സരത്തിൽ കമല ഹാരിസിനെ നിർദേശിച്ചതിലും ബൈഡൻ വിശദീകരണം നൽകി. രാജ്യത്തെ നയിക്കാൻ കഴിയുന്ന കരുത്തുറ്റ നേതാവാണ് കമല ഹാരിസെന്ന് അദ്ദേഹം പറഞ്ഞു.
കോവിഡ്‌ ബാധിച്ച്‌ ഡെലവേയിലെ വസതിയിൽ വിശ്രമിച്ചിരുന്ന അമേരിക്കൻ പ്രസിഡന്റ് ജോ ബൈഡൻ വൈറ്റ്‌ ഹൗസിൽ ഇന്ന് രാവിലെ തിരിച്ചെത്തി. കഴിഞ്ഞ ദിവസം നടന്ന പരിശോധനയിൽ കോവിഡ്‌ മുക്തനെന്ന്‌ ഡോക്ടർമാർ സ്ഥിരീകരിച്ചശേഷമായിരുന്നു അദ്ധേഹത്തിന്റെ മടക്കം. തിരികെ വൈറ്റ്‌ ഹൗസിൽ പ്രവേശിക്കുന്ന ചിത്രം ബൈഡൻ സമൂഹമാധ്യമത്തിൽ പങ്കിട്ടിരുന്നു.
ട്രംപുമായി നടന്ന സംവാദത്തിൽ തിരിച്ചടി നേരിടുകയും ആരോഗ്യ പ്രശ്നങ്ങൾ ചർച്ചയാകുകയും ചെയ്തതോടെയാണ് ബൈഡൻ പ്രസിഡന്റ് മത്സരത്തിൽ നിന്ന് പിൻവാങ്ങിയത്. എക്‌സിലൂടെയാണ് ബൈഡൻ സ്ഥാനാർത്ഥിത്വത്തിൽ നിന്നുള്ള പിന്മാറ്റം ലോകത്തെ അറിയിച്ചത്. രാജ്യത്തിന്റെയും ഡെമോക്രറ്റിക്ക് പാർട്ടിയുടെയും താല്പര്യം മുൻനിർത്തിയാണ് പിന്മാറ്റമെന്നാണ് ജോ ബൈഡൻ അറിയിച്ചിരുന്നത്. പ്രായവും അനാരോഗ്യവും കാരണം ബൈഡന്റെ സ്ഥാനാർത്ഥിത്വത്തിൽ വ്യാപക എതിർപ്പുണ്ടായിരുന്നു. തെരഞ്ഞെടുപ്പിന് വെറും നാല് മാസം മാത്രം ബാക്കി നിൽക്കെയായിരുന്നു ബൈഡന്റെ പിന്മാറ്റം.
