മെക്സിക്കോയിലെ ബാജിയോ-ടിജുവാന റൂട്ടിൽ സഞ്ചരിച്ച വിമാനം റാഞ്ചാൻ യാത്രക്കാരന്റെ ശ്രമം. വോളാരിസ് ഫ്ലൈറ്റിൽ 3041 എന്ന വിമാനത്തിലാണ് യാത്രക്കാരെ ഭീതിയിലാഴ്ത്തിയ അസാധാരണമായ സാഹചര്യമുണ്ടായത്. ബാജിയോ വിമാനത്താവളത്തില്‍നിന്ന് പറന്നുയർന്ന ഉടൻ കെൽ മരിയോ എൻ എന്ന യുവാവ് അക്രമാസക്തനാകുകയും, ആത്മഹത്യാ ഭീഷണി മുഴക്കുകയും ചെയ്തത്. വിമാനം പറന്നുയർന്ന് ഉയരത്തിലെത്തിയപ്പോഴാണ് യുവാവ് അക്രമാസക്തനായത്.സംഭവത്തിന്റെ വീഡിയോ ദൃശ്യങ്ങൾ സമൂഹ മാധ്യമങ്ങളിൽ വൈറൽ ആയിട്ടുണ്ട്.
എയർഹോസ്റ്റസിനെ ആക്രമിച്ച് കഴുത്തിൽ മൂച്ചയുള്ള ഒരു വസ്തു അമർത്തി ഭീഷണിപ്പെടുത്തി. തുടർന്ന് അമേരിക്കയിലേക്ക് വിമാനം തിരിച്ചുവിടാൻ പൈലറ്റിനോട് ആവശ്യപ്പെടുകയും കോക്ക്പിറ്റിലേക്ക് കടക്കാൻ ശ്രമിക്കുകയും ചെയ്തു. ഇതിനിടെ ഇയാൾ വിമാനത്തിൽനിന്ന് താഴേക്ക് ചാടി മരിക്കുമെന്ന് ഭീഷണിപ്പെടുത്തി. തുടർന്ന് പൈലറ്റ് സെൻട്രൽ മെക്സിക്കോയിലെ ഗ്വാഡലജാര അന്താരാഷ്ട്ര വിമാനത്താവളത്തിൽ വിമാനം അടിയന്തിരമായി ഇറക്കി. വിമാനത്താവളത്തിൽനിന്ന് പോലീസ് ഇയാളെ അറസ്റ്റ് ചെയ്തു.
അതെ സമയം ഹൈജാക്ക് ചെയ്യാനുള്ള ശ്രമത്തിന് പിന്നിലെ കാരണം ഇപ്പോഴും വ്യക്തമല്ല. അടുത്ത ബന്ധുവിനെ തട്ടിക്കൊണ്ടുപോയെന്നും ടിജുവാനയിലേക്ക് പോയാൽ മരിക്കുമെന്ന് ഭീഷണിപ്പെടുത്തിയതായും ഇയാൾ എയർലൈൻ ഉദ്യോഗസ്ഥരോട് പറഞ്ഞതായി പൊലീസ് പറഞ്ഞു. മരിയോ തൻ്റെ ഭാര്യയ്ക്കും രണ്ട് കുട്ടികൾക്കുമൊപ്പമാണ് യാത്ര ചെയ്തത്. സംഭവം തീവ്രവാദ ബന്ധമുണ്ടോ അതോ മറ്റെന്തെങ്കിലുമാണോയെന്ന് പൊലീസ് പരിശോധിക്കുന്നു. എല്ലാ യാത്രക്കാരും ക്രൂ അംഗങ്ങളും സുരക്ഷിതരാണെന്നും വിമാനം ലക്ഷ്യസ്ഥാനത്തേക്ക് പുറപ്പെട്ടെന്നും മെക്സിക്കൻ എയർലൈൻ അറിയിച്ചു.
